بسطيلة بعجينة المسمن روعة

المقادير :
بالنسبة للعجين
2كيسان دقيق ابيض خاص بالحلويات وكأس الفينو
ملح /معلقة سنيدة/نصف معلقة خميرة الحلويات/قبصة خميرة الخبز غير شوية والما دافي للعجن نعجنوها وندلكوها مزيان ونخليوها قاصحة شوية نغطيوها ببلاستيكة ونخلوها ترتاح
الحشوة:
بصلة مشلظة /فلافل مقطعة مربعات صغار لي كان عندكم متوفر أخضر أحمر ولا خلطوهم /خيزو محكوك (الكمية اختيارية)/كرعة خضرا محكوكة/شوية كفتة أو دجاج أو طون لي كان الأهم هو تكون الخضرة اكتر من لحم /زيتون مقطع رقيق/فرماج متزريلا
الطريقة:
كنديرو البصلة والفلفلة تشحر فزيت حتى تنزل شوية عاد نزيد خيزو والكرعة ونحرك حتى يتشحرو عاد ندير توابل (ابزار/سكنجبير غير شوية رأس معلقة /شوية هريسة /معلقة مطارد/تحميرة /قرفة نحركو مزيان ونزيد الكفتة حتى تنشف من الماء نزيد الزيتون والربيع مقطع ونطفي البوطة ونخليها تبرد مزيااان
العجينة نقصهما 3كرات كبار شوية و6 كرات أو 5 أصغر منهم
ناخد 2من الكرات الكبار وندهنهم بزيت ونرش بيناتهم دقيق وندير وحدة فوق وحدة ونطلقهم مزيان حتى يوليو رقاق نخليهم على جنب ناخد كرة من الصغار ونطلقها بزيت ونديرها فوق هادوك لي طلقت فالوسط وندير فوقها الحشوة شوية ونعاود نطلق كرة صغيرة ونديرها فوق الحشوة وندير فوقها الحشوة ونكمل طريقة هكاك بحال شكل المشلتت ولا ماعرفت اش سميتو ههه طبقة العجين فوقها الحشوة فوقها العجين ههه كنتمنا تفهمو حتى نكمل الكرات الصغار والطبقة الأخيرة منديرش فوقها الحشو ونغطي العجين بجوانب هادوك الكرات لي طلقت فالأول ونقلبها فلاطة نكرصها شوية ونزينها بشرائط من الكرة الكبيرة لي بقات قويت عليكم بقوة الكرات 😅المهم لي معندهاش انترنت ومفهماتش نزيد نشرح أكثر
ندخلها لفران على عافية مهيلة باش طيب وتجي مقرمشة حتى تحمر ونخرجها ندهنها باصفر البيض وندخلها يطيب البيض وكيعطي هاد اللون المدهب وبالصحة والراحة 😍